Aizawl: Tunlaia Mizoram titi leh sawi hlawh tak, YMa leh Mizo mipuite khawvel pum hriata Chin mite laka rilru diklo pu leh hnuaichhiah nia ngaih theih tura internet-a Human Rights Watch report thehdarh chu Mizoram-a awm mek ‘Chin community in Mizoram’ intite chuan a dik tawh lo tiin sawifiahin thu an tichhuak.
Chin Community in Mizoram (CCM) thuchhuajin a tarlan dan chuan Human Rights Watch, Thailand-a awm ten Ja. ni 28, 2009 khan Bangkok-ah report an tlangzarh a, he report zingah hian Mizoram mipuite chungchang belhchian dawllo tak thuziak a awm tih sawiin an dem takzet thu an puang a. Hetiang hian an sawifiah nghal bawk.
HRW report (252)-a YMA-in Chin mite Mizoram atanga hnawhchhuahna order a siam anga thu ziak hi diklo taka ziak a ni a. Hetianga thuchhuah hi Central YMA in a siam kan hre lo. September 2008-ah Mizoram atanga hnawchhuahna order avanga chhuak an awm lo.
HRW report (263)-a Mizote rilru puthmang anga thuziak ‘Chin mi pakhat tihhlum hi ui pakhat tihhlum tluk lek a ni’ tia an ziak hi, Mizo mipuite hmuhsitna leh an zahawmna tihbawrhban theihna thuziak a ni a. He ngaihdan hi Mizote rilru puthmang ang lo taka ‘Report’ hi Zo Hnahthlak unaute inkara inhmuh thiamlohna thlen thei, tawngkam chhe tak a nih avangin kan dem takmeuh a ni.
HRW report (285/286)-a tarlan, "Chin mite tan thlanmual hran, khaw pawnah Mizo-ten an siamsak" tia an tarlan hi thu dik a ni lo. Riangvaite thlanmual hi tu tih hriat loh leh ruang latu awm lo mitthu te tana sorkar siam a ni lo. Chin mite kan thih hian kan awmna veng thlanmualah YMA buaipuia vui kan ni. Chuvangin, Chin mite tana khaw pawna siamsak anga ziak hi thu belhchian dawllo a ni.
HRW Report (297,298,299)-a tarlan, India Danin naupang kum tlinglo hna thawhtir chungchangah hian retheih luat tuk avangin chhhungkaw tan naupangte pawhin hna an thawk bawk a ni. Tihluihna avanga thawk an awm hriat a ni lo.
Heng human rights watch thuziak thenkhatte hi kan inunauna tichhe thei thuziak a ni a, Mizo mipuite ngaihdan emaw,Chin Community te ngaihdan laka tihchiana a awm lo tiin, hetiang thil hi tun hnu-ah chuan thleng leh tawh lo turin kan duh takmeuh a ni, CCM thuchhuah chuan a ti.
CCM te hian Human Rights watch report an sawifiahnaah hian internet lama HRW te thu tarlan zawng zawng an sawifiah lova, an sawifiah loh zingah hian thu ngaimawhawm tamtak a la awm niin thudawnna chuan a sawi a. Chung zingah chuan Biak In kharsak chungchang te, Lung in tang (Prisoner) ang mai kan ni, tia sawi te leh Mizo mipui tana ngeiawm tak takte a la tel.
Internet Website pakhat Human Rights watch-ah hian YMA leh Mizo hnam pum hmingchhiatna thu engemawzat chu ‘Life for Chin in Mizoram’ tiin January 27, 2009-a post-ah tarlan a ni a. Mizoram-a Burma mi nia sawite dinhmun hrang hrang tarlan a ni ber. (Courtesy ZALEN)
[emizoram]
No comments:
Post a Comment